ქუთაისის საერთაშორისო აეროპორტი

განახლებული და გაფართოებული ქუთაისის საერთაშორისო აეროპორტი, რომელიც ქალაქ ქუთაისში მდებარეობს, წარმოადგენს ერთ-ერთ მნიშვნელოვან, ევროპასთან დამაკავშირებელ ჰაბს საქართველოში, ემსახურება როგორც შიდა, ასევე საერთაშორისო ფრენებს და აკავშირებს რეგიონს ევროპასთან.

ქუთაისის საერთაშორისო აეროპორტი 2011-2013 წლებში აშენდა, აეროპორტის ტერმინალის და სანავიგაციო კოშკურის სრული აღდგენა მოხდა, ხოლო ასაფრენ-დასაფრენი ბილიკისა და სხვა აეროდრომის ინფრასტრუქტურას მასშტაბური სარეაბილიტაციო სამუშაოები ჩაუტარდა.

2016-2017 წლებში აშენდა მეორე სამიმოსვლო ბილიკი, გაფართოვდა ბაქანი და შესაბამისად გაიზარდა ხომალდების სადგომის რაოდენობა 3-დან 9-მდე, ხოლო რეაბილიტაცია ჩაუტარდა აეროდრომის (300ჰა) სანიაღვრე სისტემებს, სრულად განახლდა ბაქანის განათების სისტემა და ა.შ.

2021 წელს ქუთაისის საერთაშორისო აეროპორტის ახალი, გაფართოებული ტერმინალი გაიხსნა, რომელიც მანამდე არსებულთან შედარების ზომაში 6-ჯერ გაიზარდა. აღნიშნულმა ცვლილებამ აეროპორტი უფრო მიმზიდველი გახადა ახალი ავიაკომპანიებისთვის. 2022 წელს, ასაფრენ-დასაფრენ ბილიკს ასევე ჩაუტარდა სარეაბილიტაციო სამუშაოები.

ქუთაისის აეროპორტს, რომელიც საქართველოში სიდიდით მეორე აეროპორტს წარმოადგენს, მართავს საქართველოს აეროპორტების გაერთიანება. აეროპორტში ბაზირებულია ვიზეარის ხომალდები და ასევე ემსახურება ისეთ საერთაშორისო ავიაკომპანიებს, როგორებიცაა Pegasus, FlyArystan, Belavia.

ბოლო 5 წლის განმავლობაში ქუთაისის აეროპორტში მგზავრთნაკადი საშუალოდ 30%-ით გაიზარდა, ხოლო 2018 და 2019 წლებში ACI-ის მიერ დასახელდა ევროპაში მეორე სწრაფად მზარდ აეროპორტად ისეთ აეროპორტებს შორის, რომლებიც 5 მილიონზე ნაკლებ მგზავრს ემსახურება წელიწადში.

2024 წლის რეიტინგში ქუთაისის საერთაშორისო აეროპორტი მოხვდა ტოპ 5 საშუალო ზომის აეროპორტს შორის, 2019 წელთან შედარებით მგზავრთნაკადის აღდგენის მაჩვენებლის გათვალისწინებლით. 2024 წელს მგზავრთნაკადი 2019 წელთან შედარებით 97%-ით, ხოლო ფრენების რაოდენობა 76%-ით გაიზარდა. აეროპორტი 2024 წელს 1,7 მილიონ მგზავრს მოემსახურა.